Gwamnan Jihar Kano, Abba Kabir Yusuf, ya sanar da ficewarsa daga jam’iyyar NNPP mai mulki a jihar, matakin da ya girgiza siyasar Arewa kuma ya ƙara janyo cece-kuce a fagen siyasar Najeriya.
Mai magana da yawunsa, Sanusi Bature Dakin-Tofa, ya tabbatar da ficewar gwamnan a ranar Juma’a, inda ya bayyana cewa rikicin cikin gida da ya dabaibaye jam’iyyar NNPP ne ya tilasta wa gwamnan ɗaukar wannan mataki.
A cewar sanarwar, Gwamna Abba Kabir Yusuf ya rubuta wasiƙa a hukumance zuwa ofishin NNPP na mazaɓar Diso-Chiranchi da ke Ƙaramar Hukumar Gwale, inda ya bayyana ficewarsa daga jam’iyyar a ranar 23 ga Janairu, 2026.
Ba shi kaɗai ba, gwamnan ya fice tare da ’yan majalisar dokokin jiha 21 da kuma ’yan majalisar tarayya takwas, abin da ke nuna babbar sauyi a tsarin siyasar Kano.
Tun makonni da suka gabata ake raɗe-raɗin cewa gwamnan na shirin barin NNPP, kuma ana ta hasashen cewa zai koma jam’iyyar APC mai mulki. Wannan hasashe ya ƙara ƙarfi bayan ganawar sirri da ya yi da Shugaban Ƙasa Bola Ahmed Tinubu, kodayake gwamnatin jihar ta ce tattaunawar ta mayar da hankali ne kan tsaro da ci gaban Kano.
