Gwamnatin Sudan ta koma gudanar da ayyukanta a hukumance a birnin Khartoum a ranar Lahadi, karo na farko tun bayan ɓarkewar yaƙin da aka fara da dakarun Rapid Support Forces (RSF) a watan Afrilun 2023.
Firaminista Kamel Idris, yayin jawabi bayan isarsa daga Port Sudan—inda gwamnati ta yi zaman wucin-gadi—ya bayyana dawowar a matsayin muhimmin juyi ga ƙasar, yana mai cewa gwamnati ta dawo da sabuwar fata ga al’ummar Sudan.
Idris ya yi alƙawarin farfaɗo da sassan kiwon lafiya da ilimi, sake gina asibitoci da makarantu, tare da ba da muhimmanci ga Jami’ar Khartoum. Ya kuma jaddada aniyar gwamnati na inganta tsaro da yanayin rayuwar jama’a.
Firaministan ya ce kasafin kuɗin shekarar 2026 an shirya shi ne ba tare da ƙara nauyin kuɗi ga jama’a ba, tare da burin rage hauhawar farashi daga sama da kashi 70 cikin 100, da kuma ƙara bunƙasar tattalin arziƙin ƙasa zuwa kashi 10.
Ya bayyana shekarar 2026 a matsayin “shekarar zaman lafiya,” yana mai cewa lokaci ne na sake gina ƙasa bayan mummunan yaƙin da ya addabi Sudan.
Tun a watan Mayu, rundunar sojin Sudan ta sanar da karɓar cikakken iko da Khartoum bayan fatattakar RSF, lamarin da ya share fagen komawar hukumomin gwamnati zuwa babban birnin ƙasar.
