Yanayin tsaro a Isra’ila ya ƙara tsananta bayan Iran ta zafafa hare-haren makamai masu linzami a matsayin martani ga farmakin haɗin gwiwar Amurka da Isra’ila da ya kashe Jagoran Addinin Iran, Ali Khamenei. Makaman sun rika sauka a birane da dama, lamarin da ya haddasa asarar rayuka da jikkata fararen hula.
Rahotanni daga majiyoyin Isra’ila sun ce aƙalla mutum 12 ne suka mutu yayin da sama da 50 suka jikkata. Duk da cewa tsarin kariyar sararin samaniya na Isra’ila — ciki har da Iron Dome, David’s Sling da Arrow — sun tare yawancin makaman, wasu sun tsallake suka faɗo kai tsaye a wuraren zama.
Hari mafi muni ya auku ne a Beit Shemesh, yammacin Ƙudus, inda wani makami mai linzami ya lalata gidaje da dama har da wani maɓoya da aka gina domin kariya daga harin bam. Hukumar agajin gaggawa ta Magen David Adom ta rika sabunta alkaluman mace-mace yayin da ake ci gaba da ceto mutane daga ƙarƙashin gine-ginen da suka rufta.
Hare-haren sun kuma shafi Tel Aviv da wasu sassan Ƙudus, inda aka ba da rahoton karin jikkata sakamakon fashewar makamai da tarkacen ƙarafuna. Hukumomi sun bukaci mazauna ƙasar da su bi umarnin gargaɗi tare da neman mafaka yayin da ƙararrawa ke ci gaba da kaɗawa a yankuna da dama.
