Babbar Jakadiyar Ghana a Birtaniya, Sabah Zita Benson, ta yi kira ga ɗaliban PhD na Ghana da ke karatu a ƙasar su yi haƙuri yayin da gwamnati ke ƙoƙarin biyan bashin kuɗaɗen tallafin karatu, ciki har da kuɗin makaranta da alawus.
Ta bayyana cewa tana aiki kafada da kafada da Hukumar Tallafin Karatu ta Ghana domin ganin an saki kuɗaɗen, tare da ba da tabbacin cewa da zarar an samu kuɗi daga Ma’aikatar Kuɗi, za a fara biyan bashin. Ta amince cewa lamarin na damun ɗalibai, musamman ganin cewa wasu sun shafe fiye da shekara guda ba tare da tallafi ba, abin da ya sa wasu ke fuskantar barazanar korar su daga masauki da dogaro da bankunan abinci.
Jakadiyar Ghana a Birtaniya ta ce jinkirin biyan tallafin karatu ya samo asali ne daga jinkirin sakin kasafin kuɗi daga Ma’aikatar Kuɗi. Ta roƙi ɗaliban PhD su yi haƙuri, tana mai tabbatar da cewa ana aiki don warware matsalar kafin ƙarshen wannan zangon kuɗi.
