An ruwaito cewa faɗan da ya ɓarke tsakanin matukan wani jirgin fasinja da ke tashi daga Dubai zuwa Tel Aviv ya sa an aika da lambar gargaɗin yiwuwar yin garkuwa da jirgi, kafin daga bisani jirgin ya sauka a Saudiyya a ranar Laraba, kamar yadda Jaridar Isra’ila Ynet ta ruwaito.
Jaridar ta ce jirgin yana shirin sauka ne a filin jirgin saman Ben Gurion, kuma yana ɗauke da fasinjoji 174. Jirgin ya kuma aika da siginar gaggawa na ɗan lokaci.
A cewar rahoton, an kunna lambar da ke nuna yiwuwar yin garkuwa da jirgi ne yayin da rikici ya ɓarke a cikin ɗakin matukan jirgin.
Daga bisani jirgin ya sauka a filin jirgin saman Tabuk na Saudiyya.
Kimanin mintuna 90 bayan tashinsa, yayin da jirgin ke shiga sararin samaniyar Jordan, ya aika da lambar “7700”, wadda ake amfani da ita a duniya wajen nuna wata babbar matsalar gaggawa.
Daga bisani kuma ya aika da lambar “7500”, wadda ke nuna kutsen cikin jirgi ba bisa ƙa’ida ba, ciki har da yiwuwar yin garkuwa da shi.
A kusan lokaci guda, jirgin ya sauya hanya, ya koma cikin sararin samaniyar Saudiyya, sannan ya fara shawagi a ƙasa a kan ƙasar, a cewar rahoton.
Bayan da ya fara tafiya zuwa kudu, jirgin ya juya zuwa yamma, yayin da yake ci gaba da kasancewa cikin sararin samaniyar Saudiyya, kafin daga bisani ya sauka a ƙasar.
Faɗa tsakanin matukan jirgin
Daga bisani tashar Channel 12 ta Isra’ila ta ce al’amarin bai yi kama da wata matsalar tsaro ba, kuma hukumomi na binciken ko an kunna siginar gaggawar ne bisa kuskure sakamakon wata gardama tsakanin matukin jirgin da mataimakinsa.
Tashar ta ce ma’aikatan jirgin sun haɗa da wani matukin jirgi ɗan Rasha da mataimakin matukin jirgi ɗan Ukraine.
Ynet ta ruwaito cewa FlyDubai daga bisani ta sanar da hukumomin Isra’ila cewa za ta tura wani jirgin daga Dubai zuwa Saudiyya domin dawo da fasinjojin Isra’ila da ke cikin jirgin.
A nasa ɓangaren, Hukumar Kula da Filayen Jiragen Saman Isra’ila ta musanta rahotannin cewa an rufe sararin samaniyar ƙasar yayin faruwar lamarin.
Wasu manyan jami’an masana’antar sufurin jiragen sama ta Isra’ila sun ce har yanzu ba a kawar da zargin cewa lamarin na da alaƙa da tsaro ba, kamar yadda Ynet ta ruwaito.
A cewar wani bincike na farko da jami’an suka ambata, ana zargin ɗaya daga cikin matukan jirgin da “ƙoƙarin haddasa hatsarin jirgin,” yayin da ɗayan matukin ya yi nasarar dakile yunƙurin tare da taimakon wasu fasinjojin Isra’ila.
Ofishin Firaministan Isra’ila ya ce lamarin yana “ƙarƙashin iko”, tare da cewa “ana amfani da dukkan hanyoyin da ake da su yanzu domin tabbatar da an dawo da fasinjojin Isra’ila cikin aminci zuwa Isra’ila.”
