Firayim Ministan Kanada, Mark Carney, ya bayyana cewa ƙasarsa za ta bai wa Ukraine kusan dala biliyan 2 a matsayin tallafin soja. Sanarwar ta zo ne yayin tunawa da cika shekara ta huɗu da fara yaƙin, inda Carney ya ce tallafin zai taimaka wa Kiev wajen gina rundunar soji mai ƙarfi da juriya.
Ya ƙara da cewa za a ware dala miliyan 20 domin gyaran muhimman ababen more rayuwa da hare-haren Rasha suka lalata. Carney ya jaddada cewa Kanada ta riga ta bai wa Ukraine tallafi sama da dala biliyan 25.5 tun 2022, ciki har da sama da dala biliyan 13 na tallafin kuɗi kai tsaye.
Haka kuma, shugaban gwamnatin ya sanar da ƙarin takunkumai kan Rasha, musamman ga cibiyoyin da ke tallafa wa yaƙin ta fuskar kuɗi. A cewarsa, Kanada za ta rage iyakar farashin danyen man Rasha da aka gindaya a baya, wanda ya kasance dala 60 kan kowace ganga.
Tun daga Fabrairu 2022, Rasha ke ci gaba da hare-haren soja a Ukraine, yayin da Moscow ke danganta yiwuwar kawo ƙarshen rikicin da matakin Kiev na kin shiga ƙungiyoyin tsaron Yamma — sharadi da Ukraine ke kallon sa a matsayin tsoma baki a harkokinta na cikin gida.
