Al’umma da masoyan kwallon kafa a Nijeriya sun shiga jimami bayan rasuwar mahaifin kyaftin ɗin Super Eagles, Wilfred Ndidi, wanda ya mutu a wani mummunan hatsarin mota a garin Umunede da ke Jihar Delta, mako guda kacal bayan Ndidi ya taimaka wa ƙasar samun matsayi na uku a Gasar Kofin Afirka.
Daraktan sadarwa na Hukumar Kwallon Kafa ta Nijeriya (NFF), Ademola Olajire, ya tabbatar da cewa Sunday Ndidi ya rasu da safiyar Talata sakamakon hatsarin. Ndidi, mai shekaru 29, ya bayyana alhini mai raɗaɗi a shafinsa na Instagram, inda ya tuna da hirarsa ta ƙarshe da mahaifinsa, yana mai cewa maganar bankwana ce ba tare da ya sani ba.
Ya kuma tuna yadda ya yi rawar murna ta musamman bayan ya zira kwallonsa ta farko a ƙungiyar ƙasa domin girmama mahaifinsa. Hukumar NFF da kulob ɗinsa na Turkiyya, Beşiktaş, sun aike da saƙonnin ta’aziyya, suna miƙa jaje ga Ndidi da iyalansa.
