Farkon sabuwar shekarar karatu na fuskantar rikici a Ghana, yayin da dubban malamai ke ƙara matsa wa gwamnati lamba kan bashin albashin da suka shafe fiye da shekara guda ba tare da an biya su ba.
Ƙungiyar Coalition of Unpaid Teachers ta bai wa gwamnatin Ghana wa’adi na ƙarshe, tana barazanar fita gagarumar zanga-zangar titi da kuma ɗaukar matakin shari’a kan bashin albashi da ya kai kusan shekara guda.
A cewar ƙungiyar, sama da malamai 6,000 ne a faɗin ƙasar da ke fama da talauci mai tsanani sakamakon jinkirin biyan albashi da kuma gazawar Hukumar Ilimi ta Ghana (GES) wajen fitar da katin shaidar aiki (Staff ID Cards).
Ƙungiyar ta ce yawancin mambobinta sun shafe tsakanin watanni 12 zuwa 15 suna aiki a makarantu, amma an biya su albashin watanni biyu kacal. Wannan rashin daidaito, a cewarsu, ya jefa malamai da dama cikin matsanancin hali na rayuwa da damuwa ta tunani.
Jagoran ƙungiyar, Simon Kofi Nartey, ya bayyana a wata hira da gidan rediyon Citi FM ranar Lahadi cewa jinkirin na da mummunar illa ga walwalar malamai. Ya yi kira ga gwamnati da ta saurari kukansu tare da biyan bashin da ake binsu domin su ci gaba da aikinsu cikin kwanciyar hankali.
Babbar matsalar da ke hana biyan albashin, in ji ƙungiyar, ita ce rashin fitar da katunan shaidar aiki, wanda hakan ke hana shigar da malamai cikin tsarin biyan albashi na kwamfuta. Nartey ya gargadi cewa lokaci na ƙarewa, yana mai buƙatar a kammala fitar da dukkan katunan kafin a rufe albashin watan Janairu na 2026.
Baya ga zanga-zanga, ƙungiyar ta ce tana tattaunawa da lauyoyi domin shigar da ƙara a kotu. Sun bayyana tsarin a matsayin rashin adalci, inda malamai da aka ɗauka aiki lokaci guda kuma aka tura su wuri ɗaya ke samun sakamako daban-daban a batun biyan albashi.
