Mapigano mapya kati ya M23 na vikosi vya serikali ya Jamhuri ya Kidemokrasia ya Congo yamesababisha mamia ya raia kukimbia makazi yao mashariki mwa nchi hiyo.
Kwa mujibu wa vyanzo vya ndani na OCHA, mapigano yalianza Jumapili katika eneo la Bukumbi, wilaya ya Masisi, jimbo la Kivu Kaskazini, na kuendelea hadi Jumanne.
Watu waliokimbia makazi yao wamekimbilia maeneo ya misitu ya karibu huku wengine wakielekea wilaya jirani ya Walikale, wakikabiliwa na hali ngumu ya maisha.
Mapigano hayo yanatokea wakati juhudi za amani zinazoongozwa na Qatar zikiendelea nchini Uswisi, ambapo pande hasimu zimekubaliana kuwaachilia wafungwa na kuruhusu misaada ya kibinadamu kufika bila vikwazo.
Hata hivyo, hali ya usalama bado ni tete, huku jeshi la serikali likiwa bado halijatoa taarifa rasmi kuhusu mapigano hayo ya karibuni.
CHANZO: TRT Afrika
