Wani sabon bincike da mujallar Internationale Politik ta ruwaito ya nuna cewa mafi yawan jama’a a Jamus ba su gamsu da cewa gwamnatin su na da cikakken tsari kan rikicin Iran ba. Kimanin kashi 68% sun ce babu wani tabbataccen shiri, yayin da kashi 28% kacal ke ganin akwai wata hanya da aka tsara.
Masu goyon bayan jam’iyyun Christian Democratic Union da Christian Social Union ne kaɗai suka nuna ɗan ƙaramin rinjaye na amincewa da yadda gwamnati ke tafiyar da lamarin.
Sai dai sauran jama’a da dama ba su yarda ba. Har ma a cikin masu goyon bayan jam’iyyar gwamnati ta Social Democratic Party, mafi rinjaye na ganin babu wani tsari mai kyau. Ra’ayin rashin yarda ya fi ƙarfi a tsakanin jam’iyyun adawa kamar Alternative for Germany, The Left, da Alliance 90/The Greens.
A yankin gabashin Jamus, damuwar ta fi tsanani, inda mafi yawan mutane ke ganin matsayin gwamnati bai bayyana ba. Haka kuma matasa masu shekaru 18 zuwa 29 sun fito dabam, inda kusan kashi uku cikin huɗu ke nuna rashin tabbas.
Wannan ruɗani na iya nasaba da saƙonni masu rikitarwa daga Firayim Minista Friedrich Merz, wanda da farko ya goyi bayan matakan Amurka da Isra’ila kan Iran, amma daga baya ya soki Amurka, ciki har da gwamnatin Donald Trump, kan rashin cikakken tsari.
A ƙarshe, binciken ya nuna yadda damuwa da rashin tabbas ke ƙaruwa a tsakanin jama’ar Jamus dangane da rawar da ƙasar ke takawa a cikin yanayin duniya mai cike da tashin hankali.
MAJIYAR LABARI: AA
