Rais wa Burundi, Evariste Ndayishimiye, amemfuta kazi Waziri wa Miundombinu, Makazi ya Kijamii na Uchukuzi, Damien Niyonkuru, baada ya kuhudumu chini ya miezi mitatu tangu kuteuliwa kwake mwezi Januari mwaka huu.
Kwa mujibu wa amri ya rais iliyotolewa Jumanne, nafasi yake imechukuliwa na Egide Nijimbere, ambaye hapo awali alikuwa katibu mkuu wa kudumu katika wizara hiyo kwa zaidi ya miaka mitano.
Ingawa serikali haijatoa sababu rasmi za kuondolewa kwa Niyonkuru, hatua hiyo imekuja wakati ambapo wananchi wamekuwa wakilalamikia kuchelewa kwa miradi ya maendeleo ya umma pamoja na matatizo ya usambazaji wa mafuta nchini humo.
Burundi imekuwa ikikabiliwa na uhaba wa mafuta kwa miezi kadhaa, hali iliyosababisha foleni ndefu katika vituo vya mafuta na kuongeza shinikizo kwa serikali ya Rais Ndayishimiye.
