A cikin ‘yan kwanakin nan, rahotanni daga sassan ƙasar sun nuna yadda rundunar sojin Nijeriya ke ƙara matsa lamba kan ‘yan ta’adda da masu aikata laifuka, lamarin da ya haifar da gagarumar nasara a fannonin tsaro daban-daban.
Rundunar Sojin Nijeriya ta ce ta samu manyan nasarori a samamen da ta kai a faɗin ƙasar cikin awanni 72 da suka gabata, inda ta kashe ‘yan ta’adda 47. Sanarwar da rundunar ta wallafa a shafinta na X ranar Laraba ta bayyana cewa an kuma kama mutane 19 da ake zargi da aikata laifuka, tare da ceto fiye da mutane 30 da aka yi garkuwa da su.
A cewar sanarwar, sojojin sun ƙwato tarin makamai da suka haɗa da bindigogi ƙirar AK-47, harsasai, mujallu, rediyon sadarwa, babura, wayoyin hannu da sauran kayan aiki da ake amfani da su wajen aikata munanan laifuka.
A yankunan Arewa maso Yamma da Arewa ta Tsakiya, sojoji sun kai samamen ƙasa bisa sahihan bayanan sirri. A Jihar Sokoto, dakaru sun kashe ‘yan ta’addar Lakurawa uku a Binji da Tangaza, inda suka ƙwato bindiga AK-47 da wasu kayayyaki. Haka kuma a Jihar Neja, an kashe wani ɗan ta’adda a Munya tare da ƙwato makamai da kayan sadarwa.
A Zamfara, sintirin sojoji a Anka da Maru ya lalata maɓoyar ‘yan ta’adda tare da kashe biyu daga cikinsu da ceto fararen-hula da suka jikkata. A Kaduna kuwa, ayyukan tsaro a Sanga da Zangon Kataf sun daƙile fashi da makami da garkuwa da mutane, an kuma kama masu satar shanu tare da ƙwato dabbobi da makamai.
A Jihar Filato, sojoji sun kama mutane uku da ake zargi da satar shanu a Barikin Ladi da Wase, tare da ƙwato babura, wuƙaƙe, kuɗi da wayoyin hannu.
A yankunan Kudu maso Kudu da Kudu maso Gabas, rundunar ta ce ta samu nasarori masu muhimmanci. A Ribas, an kama mutane biyu a Degema yayin da ake shirin aikata ɓarna. A Delta, an gano jiragen ruwa na katako dauke da lita 1,700 na man fetur da aka sace. A Imo, an kama wani da ake zargi da harbin farar-hula, yayin da a Abuja aka kama mutane 11 a yaki da haƙar ma’adanai ba bisa ƙa’ida ba.
A Arewa maso Gabas kuma, Rundunar Sojin Sama ta ci gaba da kai farmaki ta sama kan sansanonin ISWAP/JAS a Jihar Borno, inda aka kashe aƙalla ‘yan ta’adda 42 tare da lalata tarin makamai da abubuwan fashewa.
Rundunar ta tabbatar da cewa an kwashe waɗanda aka ceto lafiya, ciki har da mata da yara, tare da ba su kulawar da ta dace kafin miƙa su ga iyalansu.
Babban Hafsan Sojan Ƙasa, Laftanal Janar Waidi Shaibu, ya jaddada muhimmancin haɗin kan jama’a da bayar da sahihan bayanan sirri, yana mai cewa rundunar za ta ci gaba da aiki tare da sauran hukumomin tsaro domin samar da zaman lafiya mai ɗorewa a Nijeriya.
