Daraktan kula da basussuka na Senegal, Alioune Diouf, ya ce yanzu bayanan bashin ƙasar sun zama a bayyane kuma sun yi daidai da na Asusun IMF, bayan bincike ya gano wasu basussuka da ba a bayyana ba a baya. Wannan matsala ce da ta sa IMF ta dakatar da wani shiri na dala biliyan 1.8.
A cewar Diouf, yanzu gwamnati da IMF suna aiki da bayanai iri ɗaya game da bashin ƙasar da kuma kasafin kuɗi, abin da zai taimaka wajen dawo da amincewa a harkokin tattalin arziki. Hukumomi sun kuma ƙara inganta bayyana bayanai ta hanyar rahotannin kasafi na kowane wata uku da kuma fitar da cikakken bayanin bashin ƙasa.
Duk da haka, har yanzu akwai wasu mu’amaloli na kuɗi, musamman waɗanda suka shafi derivatives, da ake haɗawa gaba ɗaya a cikin bayanai ba tare da bayyana su ɗaya-ɗaya ba. Diouf ya ce waɗannan ba su da babban haɗari, domin an tsara su ne don rage sauyin kasuwa kuma ba za su jawo matsaloli kai tsaye ba.
Game da jinkirin biyan bashi, ya bayyana cewa Senegal ba ta karya ka’idojin lokacin biyan bashi ba, sai dai wasu basussuka ne da ba a rubuta a baya. Gwamnati ta kuma sauya wasu daga cikin basussukan zuwa takardun kuɗi da za a iya saye da sayarwa, yayin da take ci gaba da neman hanyoyin samun kuɗi a cikin yankin saboda wahalar shiga kasuwannin duniya.
Majiyar Labari: TRT AFRIKA
