Shugaban Nijeriya, Bola Ahmed Tinubu, zai tashi daga Abuja ranar Litinin, 26 ga Janairu, 2026 zuwa Ankara, babban birnin Turkiyya, domin kai wata muhimmiyar ziyarar aiki da ake sa ran za ta ƙarfafa alaƙar siyasa, tsaro da tattalin arziki tsakanin ƙasashen biyu. Ziyarar na zuwa ne a daidai lokacin da hulɗar Turkiyya da Nijeriya ke ƙara zurfi a fannoni da dama.
A cewar sanarwar da mai magana da yawun shugaban ƙasa, Bayo Onanuga, ya fitar, manufar ziyarar ita ce bunƙasa haɗin kai a fannin tsaro, ilimi, walwala, ƙirƙire-ƙirƙire, sufurin jiragen sama, kasuwanci da zuba jari. Bangarorin biyu za su tattauna muhimman batutuwan siyasa da diflomasiyya, sadarwa, makamashi, kimiyya da fasaha, tare da sa ran sanya hannu kan yarjejeniyoyi da dama.
A yayin ziyarar, manyan jami’ai da ’yan kasuwa daga Nijeriya da Turkiyya za su gudanar da taruka na musamman, domin ƙarfafa haɗin gwiwa a fannoni kamar:
- Binciken kimiyya da fasaha
- Makamashi da zuba jari
- Watsa labarai da sadarwa
- Haɗin kai a fannin soji da tsaro
Shugaba Tinubu zai samu rakiyar manyan jami’an gwamnati da suka haɗa da:
Ministan Harkokin Waje Yusuf Tuggar, Ministan Shari’a Lateef Fagbemi, Ministan Tsaro Janar Christopher Musa (ritaya), Ministan Cikin Gida Olubunmi Tunji-Ojo, Ministar Al’adu Hannatu Musawa, Mai Bai wa Shugaban Ƙasa Shawara kan Tsaro Nuhu Ribadu, da Darakta Janar na Hukumar Leƙen Asiri Mohammed Mohammed, da sauransu.
An ƙulla alaƙar diflomasiyya tsakanin Nijeriya da Turkiyya tun 1960, kuma wannan ziyara na nuni da sabon mataki na zurfafa haɗin kai, musamman a bangaren tsaro da tattalin arziki.
Majiyar Labari: TRT HAUSA
