A wani muhimmin lokaci da ke nuna sabon babi a tarihin siyasar Guinea, sabon Shugaban ƙasar Mamadi Doumbouya ya yi alkawarin cewa ba zai yi amfani da ikon da aka ba shi domin biyan buƙatun kansa ba, yana jaddada cewa mulkinsa zai ginu ne bisa gaskiya, adalci da hidimar al’umma.
An rantsar da Mamadi Doumbouya a ranar Asabar bayan nasararsa a zaɓen 28 ga Disamba 2025 inda ya samu kashi 86.72% na ƙuri’u, abin da ya kawo ƙarshen mulkin soja na fiye da shekaru huɗu. A gaban Kotun Koli da shugabannin Afirka da dama, ya yi rantsuwar biyayya ga ƙasa da kundin tsarin mulki, tare da alkawarin mulki ba tare da amfani da ofishinsa don amfanin kansa ba.
Bikin rantsuwar ya samu halartar shugabannin Rwanda, Senegal, Mali, Gambia, Mauritaniya, Gabon, Saliyo da Liberia, tare da wakilai daga ƙasashe da ƙungiyoyin duniya, alamar dawowar Guinea ga cikakken mulkin farar-hula bayan juyin mulkin 2021.
Majiyar Labari: TRT HAUSA
