Rais wa Misri Abdel Fattah el-Sisi amesema anathamini ofa ya Rais wa Marekani Donald Trump ya kuingilia kati mzozo wa Bwawa Kuu la Ethiopia (GERD), akisisitiza wasiwasi wa taifa lake kuhusu usalama wa maji ya Nile. Katika ujumbe wake, Sisi alieleza kuwa Misri inategemea Nile kwa kiwango kikubwa na mradi wa Ethiopia unahatarisha mustakabali wa usambazaji wa maji.
Trump, siku ya Ijumaa, alisema yuko tayari kufufua tena upatanishi wa Marekani kati ya Misri na Ethiopia ili kutafuta suluhisho la mgogoro huo, ambao pia unahusisha Sudan. Kiongozi wa kijeshi wa Sudan, Abdel Fattah al-Burhan, alikaribisha hatua hiyo, akionyesha kuwa nchi yake pia ina wasiwasi kuhusu usalama wa maji.
Kwa upande wa Ethiopia, serikali inaona bwawa hilo lenye thamani ya dola bilioni 5 kama alama ya maendeleo na chanzo cha nishati ya umeme, na imekataa mara kadhaa madai ya Misri kuhusu tishio la usambazaji wa maji.
CHANZO: TRT Afrika
