Rais wa Nigeria Bola Ahmed Tinubu ameahidi kuimarisha ushirikiano na Uturuki katika sekta ya usalama na biashara, akisisitiza juhudi za pamoja za kukabiliana na ukosefu wa usalama na kuendeleza ukuaji wa uchumi. Akizungumza jijini Ankara katika ziara yake ya kwanza rasmi nchini Uturuki, Tinubu alimwambia Rais Recep Tayyip Erdogan: “Nitakuwa pamoja na wewe katika masuala ya demokrasia, uhuru, na maendeleo.”
Mazungumzo hayo yamezaa makubaliano tisa muhimu, yakiwemo mafunzo ya kijeshi, sera ya diaspora, elimu ya juu, uthibitishaji wa vyeti vya halal, mafunzo ya kidiplomasia, na masuala ya kijamii na wanawake.
Uhusiano wa kidiplomasia kati ya Nigeria na Uturuki ulianza mwaka 1960, na kufikia 2025 kiwango cha biashara kati ya nchi hizo kilipanda hadi dola milioni 688.4. Nigeria imekuwa mshirika mkubwa zaidi wa Uturuki Kusini mwa Jangwa la Sahara, hasa kupitia biashara ya nishati.
Jeshi la Anga la Nigeria limeimarisha ushirikiano wa kijeshi kwa kununua ndege zisizokuwa na rubani na helikopta aina ya ATAK T129 kutoka Uturuki. Zaidi ya mashirika 50 ya biashara ya Uturuki yanafanya kazi Nigeria, yakiwa na uwekezaji wa jumla wa dola milioni 400, huku miradi ya ujenzi ikifikia thamani ya karibu dola bilioni 3.
Kwa kuzingatia mchango wa Uturuki katika Somalia na msaada wake kwa juhudi za Nigeria za kupambana na ugaidi, ushirikiano wa kijeshi na kiusalama kati ya mataifa haya mawili unaendelea kuimarika hatua kwa hatua.
CHANZO: TRT Afrika
