Ƙungiyar EuroPalestine da ke Faransa ta buƙaci jama’a su ƙaurace wa dabinon da ake samarwa daga Isra’ila da aka mamaye a Yammacin Kogin Jordan. Bukatar ta zo ne a daidai lokacin watan Ramadan, lokacin da amfani da dabino ke ƙaruwa sosai.
Shugabar ƙungiyar, Olivia Zemor, ta ce ana sayar da dabinon Medjool da yawa a Faransa, inda ta yi zargin cewa wasu daga cikinsu na fitowa daga yankunan da aka mamaye. Ta kuma nuna damuwa kan yadda ake lakaba wa wasu kayayyakin asalin ƙasashe kamar Jordan ko Maroko, duk da cewa daga Isra’ila suka fito.
Ƙungiyar ta ce masu sa-kai na gudanar da wayar da kan jama’a a manyan kantuna domin ƙarfafa gwiwar masu saye su guji kayayyakin da ke da alaƙa da mamaya. Ta jaddada cewa dokokin Faransa na buƙatar bayyana ainihin asalin kaya, kuma ba daidai ba ne a danganta kayayyakin yankunan Falasɗinu da Isra’ila.
Kiran ƙauracewar na zuwa ne yayin da rikicin Gaza ke ci gaba da haifar da asarar rayuka da jikkata dubban fararen hula, a cewar hukumomin lafiya na Falasɗinu.
Majiyar Labari: TRT HAUSA
