Shugaban Rasha Vladimir Putin ya ziyarci India karo na farko tun bayan fara yaƙin Ukraine kusan shekaru huɗu da suka gabata, duk da matsin lambar da ƙasashen yammacin duniya ke yi domin ya kawo ƙarshen rikicin. Ziyarar tasa ta zo ne a lokacin da dangantaka tsakanin India da Amurka ke ƙara sarkakiya saboda shigo da mai daga Rasha da kuma matsin lambar haraji daga Amurka. India na ƙoƙarin ci gaba da daidaita dangantakarta da Rasha da Yammacin duniya tun bayan samun ’yanci, amma yaƙin Ukraine ya jefa wannan daidaito cikin ƙalubale. Putin zai gana da Firayim Minista Narendra Modi domin tattauna dangantakar kasuwanci, tsaro da batutuwan siyasa, tare da halartar taron koli na shekara-shekara da ke tsakanin ƙasashen biyu.
Rasha ta bayyana cewa wannan ziyara tana da muhimmanci domin tattauna manyan batutuwan dangantaka, musamman tsaro da harkokin kasuwanci. Putin ya zo da manyan jami’an tsaro da shugabannin kamfanonin makamashi na Rasha domin ƙara zurfafa hulɗa, musamman a fannin sayen makamai da tsarin tsaro kamar S-400. Yayin da dangantaka ta fuskar tsaro ke ƙarfafa, bangaren kasuwanci ya fuskanci sauye-sauye tun 2022, inda cinikayyar mai ta karu sosai, amma da babbar gibin kasuwanci ga India. Duk da haka, masana suna ganin ci gaban da ake iya samu yanzu shi ne fannin kwadago, inda Rasha ke bukatar ma’aikata miliyoyi nan da 2030, kuma tana ganin India a matsayin babban tushen ma’aikata.
