A wasan da ya cika da tashin hankali har zuwa busar ƙarshe, Mohamed Salah ya fito a matsayin gwarzo, inda ya ci ƙwallo a minti na ƙarshe domin bai wa Masar nasara mai wahala a kan Zimbabwe. Wasan, wanda ya kayatar matuƙa, ya gudana ne a Maroko a wasan farko na Masar a gasar Kofin Ƙasashen Afirka (AFCON), inda suka yi nasara da ci 2-1.
Kyaftin ɗin Masar, Mohamed Salah, ne ya zura ƙwallon cin nasara a minti na 91, lamarin da ya tabbatar da ƙwarewarsa da kuma dalilin da ya sa Masar ke daga cikin ƙasashen da suka fi nasara a tarihin gasar, inda suka lashe kofin sau bakwai.
Zimbabwe ce ta fara jefa Masar cikin damuwa, bayan da Prince Dube ya ci ƙwallo a minti na 20 a wasan da aka buga a maraicen Litinin. Ƙwallon ta sa Zimbabwe ta shiga hutun rabin lokaci tana kan gaba da ci 1-0.
Masar ta ci gaba da matsa lamba a rabi na biyu, har sai da Omar Marmoush ya farke ƙwallo a minti na 64, wanda ya dawo da wasan dai-daito. Duk da ƙoƙarin Zimbabwe na kare maki ɗaya, Salah ya sake bayyana a daidai lokacin da ake buƙata, inda ya kai Masar gaci da ƙwallo a mintin ƙarshe.
A wannan rukuni, Afirka ta Kudu ma ta yi nasara a kan Angola da ci 2-1, sakamakon da ya sa Masar da Afirka ta Kudu ke saman teburi da maki uku kowannensu bayan wasannin farko.
Masar dai ita ce ƙasar Afirka da ta fi kowacce yawan halartar gasar AFCON, inda ta shiga gasar har sau 26. A tarihin gasar, Masar ta buga wasanni 111, ta ci ƙwallo 175, sannan ta lashe kofin sau 7, abin da ke nuna irin ƙarfin tarihinta a gasar.
