A daidai lokacin da ake sa ran wata muhimmiyar tattaunawa tsakanin Shugaban Ukraine, Volodymyr Zelenskiy, da Shugaban Amurka, Donald Trump, Rasha ta sake jefa Ukraine cikin firgici bayan ta kai mummunan hari da makamai masu linzami da jiragen yaƙi marasa matuƙa (drones) a Kyiv da wasu sassan ƙasar.
Rasha ta kai hari kan Kyiv da wasu yankunan Ukraine da daruruwan jiragen yaƙi marasa matuƙa da kuma makamai masu linzami a ranar Asabar, lamarin da ya zo ne gabanin ganawar da Shugaba Zelenskiy ya bayyana a matsayin mai matuƙar muhimmanci da Shugaba Trump, domin lalubo hanyar kawo ƙarshen kusan shekaru huɗu na yaƙi.
Zelenskiy ya ce harin, wanda ya haɗa da kusan jirage marasa matuƙa 500 da makamai masu linzami 40, ya katse wutar lantarki da dumama gidaje a wasu sassan Kyiv. Ya bayyana harin a matsayin martanin Rasha ga yunƙurin samar da zaman lafiya da Amurka ke jagoranta.
Kafin harin, Zelenskiy ya ce tattaunawar da za a yi a Florida za ta mayar da hankali kan yankunan da kowanne ɓangare zai riƙe bayan an dakatar da faɗa, a rikicin da ya zama mafi muni a Turai tun bayan Yaƙin Duniya na Biyu, wanda ya fara ne da mamayar Ukraine da Rasha ta yi a 2022.
An ci gaba da harin har zuwa safiyar Asabar, inda aka ɗaga faɗakarwar harin sama a Kyiv na tsawon kusan sa’o’i 10. Hukumomi sun ce mutum ɗaya ya mutu a yankin Kyiv, yayin da aƙalla mutane 19 suka jikkata a cikin birnin, ciki har da yara biyu.
Zelenskiy ya yi kira ga Amurka da Turai da su ƙara matsin lamba kan Moscow, yana mai cewa mayar da bukukuwan Kirsimeti da Sabuwar Shekara zuwa lokacin rushe gidaje da lalata wutar lantarki na bukatar martani mai tsauri. Ya kuma ce jami’an ceto na ci gaba da neman wani mutum da ya maƙale ƙarƙashin ɓaraguzan gini.
Hukumomin wutar lantarki sun bayyana cewa an kai hari kan cibiyoyin makamashi a faɗin Ukraine, lamarin da ya tilasta aiwatar da katse wuta na gaggawa a Kyiv. Ministan harkokin wajen Ukraine ya ce kusan kashi ɗaya bisa uku na birnin ya rasa dumama gidaje, yayin da sama da gidaje 320,000 suka rasa wuta a yankin da ke kewaye da birnin.
Harin ya kuma haddasa rufe wasu filayen jiragen sama a ƙasar Poland, yayin da sojojin ƙasar suka ɗaga jiragen yaƙi saboda fargabar tsallakawar harin.
A ɓangaren diflomasiyya, batun iko da yankuna na ci gaba da zama babban cikas, duk da cewa Zelenskiy ya ce kashi 90% na wani daftarin shirin zaman lafiya mai maki 20 ya kammala. Batun tashar makamashin nukiliya ta Zaporizhzhia, mafi girma a Turai, da kuma yankunan Donetsk da Luhansk na daga cikin manyan matsalolin da har yanzu ba a cimma matsaya a kansu ba.
