Tsohon Mataimakin Shugaban Ƙasa Atiku Abubakar ya soki matakin Majalisar Dokoki na ƙasar na sake buga (re-gazette) dokokin haraji da aka amince da su kwanan nan, yana mai cewa dole a sake gabatar da dokokin daga farko kafin su zama doka ta gaskiya da za a iya aiwatarwa.
Atiku ya bayyana cewa bambancin da aka gano tsakanin nau’in dokar da majalisa ta amince da shi da kuma wanda aka wallafa a gazette babban matsala ce ta kundin tsarin mulki. Ya ce doka da aka wallafa ba tare da ta yi daidai da wadda aka zartar ba “ba doka ba ce, kuma ba ta da inganci.”
Ya jaddada cewa bisa tsarin mulki, doka na bukatar:
1️⃣ Zartarwa daga majalisar dattawa da wakilai
2️⃣ Sa hannu daga shugaban ƙasa
3️⃣ Sannan a wallafa ta a gazette
Ya yi gargadin cewa duk wani sauyi ko gyara bayan an wuce matakin zartarwa ba daidai ba ne kuma yana iya zama kamar “magudi ba kuskure ba.” NBA ma ta yi kira a dakatar da aiwatar da dokar har zuwa kammala bincike, yayin da majalisa ta ce za ta yi aiki da hukumomin gwamnati kan lamarin.
