Wasu da ake zargin mambobin ƙungiyar Lakurawa ne sun kai hari a wani masallaci da ke Dadinkowa, ƙaramar hukumar Maiyama a Jihar Kebbi, inda suka kashe masu ibada shida tare da jikkata wasu uku. Hukumomin tsaro sun bayyana harin a matsayin ramuwar gayya bayan wani yunƙurin kwanton bauna da ya ci tura kan ayarin sojoji.
Rahotanni sun ce maharan sun afka masallacin ne da yammacin Laraba yayin da ake tsaka da salla, inda suka buɗe wuta ba kakkautawa, lamarin da ya haifar da firgici a al’umma. Kakakin ’yan sanda a Kebbi, Bashir Usman, ya ce harin ya biyo bayan arangama tsakanin ’yan ta’addan da dakarun rundunar soji ta 8 Division.
A baya, ayarin Babban Kwamandan rundunar soji ta 8 Division, Manjo Janar Bemgha Koughna, ya fuskanci harin kwanton bauna a kusa da Maiyama Hill. Sai dai sojoji sun mayar da martani da ƙarfi, inda aka kashe maharan biyar tare da dakile harin.
Majiyoyin cikin gida sun tabbatar da mutuwar mutum shida sakamakon raunukan harbi, yayin da aka garzaya da waɗanda suka jikkata zuwa asibiti domin jinya. An ce an yi jana’izar mamatan bisa tsarin addinin Musulunci.
