Wani sansanin sojin Isra’ila da ke tsakiyar ƙasar ya gamu da ambaliya a ranar Talata bayan wata guguwa mai ƙarfi ta sauko da ruwan sama mai yawa, kamar yadda rundunar sojin ƙasar ta tabbatar. A wata sanarwa da ta wallafa a shafin X, rundunar ta ce matsanancin yanayi ne ya haddasa ambaliyar, sai dai ba ta bayyana cikakken wurin da abin ya faru ba ko irin barnar da aka samu.
Sojoji sun ce tawagogin ceto sun gaggauta shiga wurin domin shawo kan ambaliyar da kuma daidaita al’amura, tare da tabbatar da cewa ayyukan yau da kullum a sansanin sun ci gaba ba tare da tsaiko ba. Guguwar ta zo ne sakamakon wata iskar matsin lamba ƙasa da ta ratsa yankin, ta haifar da ruwan sama mai ƙarfi a sassa da dama na Isra’ila da yankunan Falasɗinu da take mamaye.
Hukumomin yanayi na Falasɗinu sun yi gargaɗin tsananin sanyi, iska mai ƙarfi da ruwan sama mai yawa, inda ake sa ran iska za ta kai gudun kilomita 80 zuwa 100 a awa guda, musamman a yankunan gabar teku.
A wani bangare na rahoton, tashar talabijin ta Isra’ila Channel 13 ta ce rundunar sojin ƙasar ta gabatar da wani shirin dogon lokaci mai suna “Hoshen” da ke ƙunshe da manyan manufofin tsaro na shekaru goma masu zuwa, wanda kudinsa ya kai shekel biliyan 350, kwatankwacin dala biliyan 111.
