Wananchi wa Uganda wamejitokeza Alhamisi, Januari 15, 2026 kupiga kura katika uchaguzi wa urais na bunge, huku ulinzi ukiimarishwa katika mji mkuu Kampala na maeneo mengine ya nchi. Jeshi na polisi wameonekana wakishika doria katika vituo vya kupigia kura, ingawa baadhi ya vituo vilichelewa kuanza zoezi hilo.
Rais Yoweri Museveni, mwenye umri wa miaka 81, anawania kuendeleza utawala wake wa takriban miongo minne dhidi ya mpinzani wake mkuu Bobi Wine na wagombea wengine sita wa upinzani. Serikali imesitisha huduma za mtandao wa simu kwa muda, ikisema hatua hiyo inalenga kuzuia kusambaa kwa taarifa potofu.
Ripoti zinaonyesha vikosi vya usalama vilitumia nguvu wakati wa kampeni za upinzani, ambapo mtu mmoja aliuawa na mamia ya wafuasi wa Wine walikamatwa. Serikali imetetea hatua hizo ikidai zilihusiana na uvunjaji wa sheria. Ofisi ya Haki za Binadamu ya Umoja wa Mataifa imeonya kuwa uchaguzi unafanyika katika mazingira ya “ukandamizaji na vitisho.”
Wapiga kura pia wanachagua zaidi ya wabunge 500. Kura zinatarajiwa kufungwa saa kumi jioni na matokeo kutangazwa ndani ya saa 48, kufikia Jumamosi alasiri.
CHANZO: TRT Afrika
