A wani ci gaba da ke kara daga martabar Najeriya a idon duniya, Tarayyar Turai ta cire ƙasar daga jerin ƙasashen da ake kallon masu haɗarin aikata safarar kuɗi da tallafa wa ta’addanci, matakin da jam’iyyar APC a Jihar Legas ta bayyana a matsayin gagarumar shaida cewa sauye-sauyen da gwamnati ke yi suna haifar da sakamako mai kyau.
Tarayyar Turai ta cire Najeriya daga jerin “ƙasashen hadari” kan safarar kuɗi da tallafin ta’addanci, tare da wasu ƙasashe kamar Afirka ta Kudu, Burkina Faso, Mali, Mozambique da Tanzania. APC a Legas ta ce wannan mataki na nuna yadda tsarin kula da harkokin kuɗi da dokoki a Najeriya ke inganta, tare da jaddada cewa hakan ya karyata sukar da ’yan adawa ke yi kan matsayin ƙasar a duniya. Jam’iyyar ta yabawa Gwamnatin Tarayya, tana kira ga ’yan ƙasa da su ci gaba da goyon bayan sauye-sauyen da ake aiwatarwa.
