A ƙoƙarin sake gina martabar Najeriya a idon duniya, Gwamnatin Tarayya ta bukaci ‘yan ƙasa, ƙwararru, hukumomi da masu zaman kansu da su haɗa kai wajen inganta sunan ƙasar ta hanyar gaskiya, aiki nagari da bayyana a fili irin ci gaban da ake samu.
Ministan Yaɗa Labarai da Wayar da Kai na Ƙasa, Mohammed Idris, ya bayyana hakan a taron Nigeria Reputation Summit 2026 da aka gudanar a Abuja, inda aka ƙaddamar da Rahoton Farko na National Reputation Perception Index na NIPR.
Ya ce rahoton madubi ne da ke nuna yadda ake kallon Najeriya, yana mai jaddada cewa duk da ƙasar na cikin rukunin ƙasashen da ake musu ƙarancin amincewa, an samu gagarumin ci gaba a ƙarƙashin mulkin Shugaba Bola Tinubu. Ya ambaci dimokuraɗiyya mai ɗorewa, gyaran tattalin arziki, cire tallafin man fetur, daidaita farashin canji, da saka jari a ababen more rayuwa, ilimi, lafiya da matasa. Ya kuma ce yaƙar labaran ƙarya da haɗin kan al’umma muhimmai ne wajen gina sahihiyar martabar ƙasa.
Majiyar Labari: TVC NEWS
