Gwamnatin Tarayya ta bai wa ɗaliban Najeriya wata sabuwar dama ta ilimi a matakin ƙoli, bayan sanar da fara karɓar aikace-aikace na tallafin karatu na ƙasashen waje na Asusun Bunƙasa Fasahar Man Fetur (PTDF) na shekarar 2026, domin horas da ƙwararru a fannonin mai da iskar gas a manyan jami’o’in duniya.
Gwamnati ta bayyana cewa tallafin karatun ya shafi ɗaliban MSc da PhD da za su yi karatu a Birtaniya, Jamus, Faransa da Malaysia, inda za a rufe kuɗin makaranta, tikitin jirgi, masauki, alawus na rayuwa, inshorar lafiya da kuɗin bincike. Ana buƙatar masu neman digiri na biyu su kasance da akalla Second Class Lower, sun kammala NYSC, suna da ilimin kwamfuta da maki biyar na O’Level ciki har da Turanci da Lissafi, yayin da masu neman PhD za su gabatar da tsarin bincike.
Shirin yana da tsauri sosai, kuma za a tantance masu nema bisa ƙwarewa, cancanta da dacewar karatunsu da ɓangaren mai da gas. Ranar ƙarshe ta neman tallafin ita ce 27 ga Fabrairu, kuma ana neman a yi rajista ta shafin scholarship.ptdf.gov.ng.
