Tsohuwar Ministar Man Fetur ta Najeriya kuma tsohuwar shugabar OPEC, Diezani Alison-Madueke, ta bayyana a gaban Kotun Southwark Crown a birnin London domin fara shari’ar da ake yi mata kan zargin karɓar cin hanci da rashawa, inda ake zarginta da amfana da kuɗi da kadarori da darajarsu ta kai sama da fam 100,000 a lokacin da take kan mulki.
Diezani, mai shekaru 65, wadda aka fara kama ta a 2015, na fuskantar tuhume-tuhume shida da Hukumar Yaki da Manyan Laifuka ta Birtaniya (NCA) ta shigar, tana zarginta da karɓar kuɗi, jiragen haya masu zaman kansu, motoci, gidaje a London, da kyaututtuka masu tsada domin ba da kwangilolin mai. Ta musanta dukkan zarge-zargen, yayin da ake sa ran fara cikakken shari’ar a ranar 26 ga Janairu 2026.
