Shugaban Kamfanin Dangote Industries Limited, Aliko Dangote, ya shigar da ƙorafi a gaban Hukumar EFCC yana zargin tsohon Daraktan Hukumar Kula da Harkokin Man Fetur ta Midstream da Downstream (NMDPRA), Farouk Ahmed, da cin hanci da rashawa da kuma amfani da ofis ba bisa ƙa’ida ba.
Dangote, ta hannun lauyansa, ya miƙa ƙorafin ne a hedikwatar EFCC bayan janye irin wannan ƙara daga hukumar ICPC, matakin da aka ce an ɗauka ne domin hanzarta bincike da shari’a. A cikin ƙorafin da Babban Lauya Dr. O.J. Onoja (SAN) ya sanya wa hannu, Dangote ya bukaci EFCC ta binciki zargin tare da gurfanar da Ahmed idan aka samu hujjoji.
Lauyan ya jaddada cewa EFCC na da cikakken iko da kayan aiki na doka domin yaƙi da laifukan kuɗi da cin hanci, yana mai kira ga hukumar ƙarƙashin jagorancin Olanipekun Olukoyede da ta ɗauki mataki cikin gaggawa domin zama darasi ga sauran jami’an gwamnati.
Dangote ya ce wannan ƙorafi na nuna ƙudirinsa na ganin gaskiya da rikon amana sun tabbata a ɓangaren mai da iskar gas na Najeriya. Ya tunatar da cewa a ranar 14 ga Disamba, 2025, ya bayyana damuwa kan salon rayuwar Farouk Ahmed, yana zargin cewa tana nesa da abin da kudin shigarsa na halal zai iya dauka.
Ya bayyana cewa ‘ya’yan Ahmed huɗu sun yi karatu a manyan makarantun Switzerland masu tsada sosai, inda kowanne ya shafe kusan shekaru shida, da kuɗin da ya kai kusan dala miliyan 5 gaba ɗaya. Haka kuma, ya yi zargin cewa an kashe ƙarin dala miliyan 2 wajen karatunsu na gaba, ciki har da shirin MBA a Jami’ar Harvard a 2025.
Dangote ya ce ‘yan Najeriya na da hakkin sanin inda aka samo irin wadannan kuɗaɗe, musamman a daidai lokacin da iyaye da dama ke fafutukar biyan kuɗin makaranta. Ya nemi cikakken bincike domin dawo da amincewar jama’a ga hukumomin kula da harkokin gwamnati.
