Jigon jam’iyyar African Democratic Congress (ADC), Kenneth Okonkwo, ya yi kakkausar suka ga Shugaban Majalisar Dattawa, Godswill Akpabio, dangane da rikicin kudurin gyaran Dokar Zabe. Okonkwo ya bayyana hakan ne yayin shirin Inside Sources da Laolu Akande ke gabatarwa a Channels Television, inda ya ce matakin da Akpabio ke dauka barazana ce ga dimokuraɗiyya.
A cewarsa, dagewa kan wasu tanade-tanaden dokar, musamman wadanda kotun koli ta riga ta yi gargadi a kansu, na nuna yunkurin ci gaba da magudin zabe, canza sakamako da karkatar da gaskiya. Okonkwo ya bayyana Akpabio a matsayin “makiyin dimokuraɗiyya”, yana mai cewa idan bai yi murabus ba, ya dace a cire shi daga mukaminsa.
Kalaman Okonkwo na zuwa ne bayan Majalisar Dattawa ta amince da kudurin gyaran Dokar Zabe zuwa karatu na uku a makon da ya gabata. Sashe na 60(30) na kudurin ya shafi batun tura sakamakon zabe ta hanyar lantarki, inda Majalisar ta yanke shawarar ci gaba da amfani da tsarin da ke cikin Dokar Zabe ta 2022.
Sai dai Majalisar ta yi watsi da bukatar tura sakamako kai tsaye a lokacin kada kuri’a ke gudana, tare da kin amincewa da dokar haramta sayen kuri’u na tsawon shekaru goma. Maimakon haka, ta ci gaba da tanadin hukuncin daurin kurkuku da tara ga masu aikata laifin sayen kuri’a.
Majiyar Labari: Channels News
