Shugaban Amurka Donald Trump ya yi barazanar daukar matakin shari’a kan ɗan barkwanci kuma mai gabatar da bikin Grammy, Trevor Noah, bayan wani barkwanci da ya yi dangane da Trump da marigayi Jeffrey Epstein a yayin bikin Grammy karo na 68. Bayan taya Billie Eilish murnar lashe kyautar Waƙar Shekara, Noah ya yi wata magana mai zuga ce-ce-ku-ce da ta haɗa Trump da Epstein.
Noah ya yi ishara da burin Trump na Greenland, kafin ya kara da wata magana da ke nuni da cewa Trump na neman “wani sabon tsibiri” bayan mutuwar Epstein, abin da ya haifar da martani mai zafi daga shugaban. Noah, wanda ya ce wannan ita ce shekararsa ta ƙarshe a matsayin mai gabatar da Grammys, a baya ya kan guji tsoma siyasa sosai a cikin barkwancinsa.
Trump ya mayar da martani ne ta shafinsa na Truth Social, inda ya soki bikin Grammys baki ɗaya tare da zargin Noah da yin kalaman ƙarya da bata suna. Ya ce bai taɓa zuwa tsibirin Epstein ba ko kusa da shi, kuma ya bukaci Noah ya “gyara gaskiyarsa,” yana mai barazanar tura lauyoyinsa don daukar mataki.
Trump ya kuma fuskanci suka tun bayan sakin miliyoyin takardu da suka shafi Epstein, wadanda suka ambaci sunayen manyan mutane da dama. Duk da haka, Trump ya dage cewa babu wata hujja da ke daure shi da Epstein, yana mai cewa kalaman Noah sun ketare iyaka.
