Tsohon Shugaban Amurka Barack Obama ya nuna damuwa sosai kan yadda jami’an Immigration and Customs Enforcement (ICE) da sauran jami’an tarayya suka gudanar da wani babban aiki a jihar Minnesota. A cewarsa, yadda aka aiwatar da aikin ya yi kama da salon mulkin kama-karya, abin da ya ce bai dace da tsarin dimokuradiyya ba.
Aikin, wanda ake kira Operation Metro Surge, ya jawo cece-kuce tun bayan da aka fara shi. Wasu mazauna yankin sun koka kan yadda jami’an suka mamaye wasu unguwanni tare da makamai, lamarin da ya haifar da tsoro a tsakanin jama’a. Abin da ya fi tayar da hankali shi ne harbe-harben da suka yi sanadiyar mutuwar farar hula biyu, wanda ya sa mutane da dama suka fito zanga-zanga.
An ce an shirya aikin ne na tsawon makonni, amma daga baya gwamnati ta sanar da rage yawan jami’an da aka tura zuwa jihar. Duk da haka, batun ya raba kan jama’a, inda wasu ke ganin an wuce gona da iri, yayin da wasu kuma ke cewa an yi ne domin tsaron ƙasa.
Obama ya ce irin wannan “halin marar izini” na jami’an tarayya abin tsoro ne ga tsarin dimokuraɗiyya, musamman ganin yadda aka samu harbe-harbe da zargin tsangwama ga al’umma, har da shafar iyalai da yara a wasu lokuta. Duk da haka, ya yaba wa yadda al’ummomi da masu zanga-zanga suka dage wajen nuna adawa da ayyukan, suna kira da a kiyaye ‘yancin ɗan adam da doka a Amurka.
Obama ya kuma yi tsokaci kan yadda irin wannan yanayi ya zama barazana ga mutunci da ladabi a harkokin siyasa, yayin da yake ganin martanin jama’a da zaman lafiya yana ba da fata cewa al’ummar Amurka za ta iya cin nasara kan kalubalen.
Majiyar Labari: TRT WORLD
