Kamfanin makamashi na Japan, JERA, da QatarEnergy sun rattaba hannu kan wata yarjejeniya ta dogon lokaci wadda za ta tanadi samar da tan miliyan 3 na iskar gas mai ruwa (LNG) a kowace shekara, daga 2028. Yarjejeniyar, wadda za ta gudana na tsawon shekaru 27, na daga cikin manyan cinikai a bangaren makamashi.
JERA ta ce matakin ya dace da manufofinta na gina tsarin samar da LNG mai ɗorewa da bambance-bambancen tushe, ta hanyar samo kaya daga Gabas ta Tsakiya, Asia-Pacific, da Amurka. Kamfanin na daga cikin manyan masu sayen LNG a duniya, yayin da tashoshin wutar lantarki masu amfani da LNG ke ci gaba da zama ginshiƙi a tsarin makamashin Japan.
Duk da kokarin fadada makamashin nukiliya da na sabuntawa, LNG na da muhimmiyar rawa a Japan. Sabon shirin makamashi ya nuna ana sa ran kaso na makamashin zafi zai ragu zuwa 30–40% nan da 2040, daga 68.6% a 2023.
A shekarar 2023, Japan ta shigo da tan miliyan 66.15 na LNG, inda Australia ke kan gaba a masu samarwa. Haka kuma, ma’aikatar tattalin arzikin Japan ta kulla yarjejeniyar fahimta da JERA da QatarEnergy domin bai wa Tokyo damar neman karin LNG idan aka samu bala’o’i ko matsalolin gaggawa.
Majiyar Labari:AA
