Shugaban Nijeriya, Bola Ahmed Tinubu, ya isa Abu Dhabi a Ƙasar Hadin Kan Daular Larabawa (UAE) a ranar Lahadi, gabanin halartar taron Abu Dhabi Sustainability Week (ADSW) na 2026 da zai fara a ranar Litinin.
Jirgin shugaban ya sauka ne a sashin fadar shugaban ƙasa na filin jirgin Zayed International Airport da misalin ƙarfe 11:30 na dare agogon wurin.
Ministan Harkokin Waje na UAE, Sheikh Shakhboot Nahyan Al Nahyan, tare da jakadu da manyan jami’an gwamnatin Nijeriya, sun tarɓi Shugaba Tinubu. Haka kuma wasu ministoci sun tarbe shi a otal ɗinsa.
Shugaban ya zo Abu Dhabi ne daga Turai, inda ya yi tattaunawa da shugabannin Rwanda da Faransa. Taron ADSW na bana zai tattauna batutuwan ci gaba mai ɗorewa, sauyin yanayi, makamashi da bunƙasar tattalin arziki.
