Wani soja na kasar Chadi ya rasa ransa yayin da wasu biyu suka jikkata sakamakon harin da wasu ‘yan bindiga da ake zargin ‘yan kungiyar ta’addanci Boko Haram ne suka kai kan wani sansanin sojojin kasar a yankin Tafkin Chadi. Harin ya faru ne a daren Litinin zuwa Talata, inda sojojin Chadi suka fuskanci farmaki daga mayakan kungiyar.
Shugaban kasar Chadi, Mahamat Déby Itno, ya bayyana cewa rundunar tsaro ta kasar ta mayar da martani cikin gaggawa bayan harin. A cewarsa, sojojin sun samu nasarar kashe ‘yan bindiga takwas tare da kwato wasu muhimman makaman yaki daga hannunsu, duk da cewa an rasa soja guda daya yayin arangamar.
Yankin Tafkin Chadi dai ya dade yana fama da hare-haren Boko Haram, kungiyar da ta samo asali daga Najeriya amma take kai hare-hare a kasashen da ke kewaye da tafkin kamar Kamaru, Nijar, Najeriya da Chadi. Rikicin ya shafe sama da shekaru goma sha biyar yana haddasa asarar rayuka da tashin hankali a yankin.
A shekarar 2024 ma kungiyar ta kai wani mummunan hari a yankin, inda aka kashe sojojin Chadi kusan 40 tare da jikkata wasu da dama. Bayan wannan hari ne shugaban kasar ya kaddamar da wani samame na soja mai suna “Haskanite”, da nufin lalata karfin Boko Haram da kuma kawo karshen hare-harensu a yankin.
