Ma’aikatar Yaƙi ta Amurka (Pentagon) ta bayyana cewa kusan sojojin Amurka 140 ne suka jikkata tun bayan fara yaƙin da Iran, ciki har da sojoji takwas da suka ji raunuka masu tsanani. Babban kakakin Pentagon, Sean Parnell, ya ce an samu waɗannan raunuka ne cikin kwanaki 10 na hare-haren da Amurka ta kaddamar a wani farmaki da ta kira “Operation Epic Fury.”
A cewarsa, sojojin takwas da suka fi muni suna samun kulawar likitoci na musamman. Duk da haka, ba a bayyana cikakken irin raunukan da aka samu ba, ko suna da alaƙa da matsalar taɓin ƙwaƙwalwa (TBI) wadda kan faru bayan manyan fashe-fashe a yaƙi.
Iran kuwa ta mayar da martani da hare-haren makamai masu linzami da jiragen sama marasa matuki kan sansanonin sojin Amurka da wasu wurare a ƙasashen yankin Gulf. Rahotanni sun nuna cewa hare-haren Iran sun kashe sojojin Amurka bakwai a Kuwait da Saudiyya tare da lalata wasu muhimman wurare kamar filayen jiragen sama da wuraren tace mai.
A halin yanzu rikicin na ci gaba da tsananta, inda Amurka ta ce za ta ƙara hare-hare a Iran yayin da Tehran ke nuna aniyar ci gaba da fafatawa. A Tehran mazauna birnin sun ce sun fuskanci wasu daga cikin mafi munanan hare-haren sama, yayin da shugabannin Iran suka yi watsi da duk wata shawarar tsagaita wuta.
