Serikali ya Sudan Kusini imetangaza kuwa uchaguzi mkuu utafanyika mwezi Disemba 2026, baada ya miaka kadhaa ya kucheleweshwa mara kwa mara. Tangazo hilo limetolewa Jumanne na Waziri wa Habari, Ateny Wek Ateny, katika mji mkuu Juba.
Kwa mujibu wa waziri huyo, uchaguzi huo lazima ufanyike kabla ya mwisho wa mwaka 2026 bila kuongezwa muda wowote. Hii inakuja baada ya uchaguzi huo ambao awali ulipangwa kufanyika mwaka 2022 kuahirishwa hadi 2024, na baadaye kusukumwa tena hadi mwaka huu.
Uchaguzi huo utakuwa wa kwanza wa kitaifa tangu Sudan Kusini ipate uhuru wake kutoka Sudan mwaka 2011. Mkataba wa amani wa mwaka 2018 ulihitimisha vita vya wenyewe kwa wenyewe vilivyodumu kwa miaka mitano, lakini hali ya kisiasa bado imekuwa tete.
Katika miezi ya hivi karibuni, mvutano umeongezeka kufuatia kukamatwa kwa Makamu wa Kwanza wa Rais, Riek Machar, mnamo mwaka 2025. Hata hivyo, serikali imesisitiza kuwa nchi kwa ujumla iko katika hali ya amani, licha ya kuwepo kwa maeneo machache yenye ukosefu wa usalama, hasa mashariki mwa jimbo la Jonglei.
Ukosefu huo wa usalama umesababisha maelfu ya wananchi kuhama makazi yao, jambo linalozua wasiwasi kuhusu maandalizi ya uchaguzi huo.
CHANZO: TRT Afrrika
