Serikali ya Qatar imetangaza kuunga mkono kurefushwa kwa muda wa usitishaji vita unaoendelea kati ya Marekani na Iran, iwapo mazungumzo yanayoongozwa na Pakistan hayatatoa makubaliano ya kudumu.
Akizungumza Jumanne mjini Doha, msemaji wa Wizara ya Mambo ya Nje, Majed Al Ansari, alisema kuwa kurefusha usitishaji huo ni hatua muhimu ili kutoa nafasi kwa suluhu ya amani kupatikana. Alisisitiza kuwa kurejea kwa mapigano hakutamnufaisha yeyote na kunaweza kuathiri vibaya uchumi wa dunia.
Qatar pia imeeleza kuunga mkono juhudi za Pakistan katika kupatanisha pande hizo mbili, ikisema inaendelea kuwasiliana na wadau mbalimbali na kufuatilia hali hiyo kwa karibu.
Mvutano huo umechukua sura ya kimataifa hasa kutokana na hali inayoendelea katika Mlango-Bahari wa Hormuz, ambao ni njia muhimu kwa usafirishaji wa mafuta na gesi. Aidha, msemaji huyo aliitaka Iran kurejea kwenye meza ya mazungumzo ili kufanikisha amani ya kudumu.
Hata hivyo, sintofahamu bado ipo baada ya Rais wa Marekani Donald Trump kusema hataki kurefusha muda wa usitishaji vita, wakati muda wa siku 14 uliokubaliwa unatarajiwa kumalizika hivi karibuni.
CHANZO: TRT Afrika
