Nahiyar Africa na fuskantar babbar matsala a bangaren makamashi, inda ake hasashen karancin man fetur zai kai tan miliyan 86 nan da shekarar 2040. Wani rahoto daga Africa Finance Corporation ya nuna cewa fiye da kashi 70% na man fetur da ake amfani da shi a Afrika ana shigo da shi ne daga waje, tare da wasu kayayyaki masu muhimmanci da kudinsu ya kai dala biliyan 230 duk shekara.
A wani taro da aka gudanar a Nairobi, attajirin Afrika Aliko Dangote ya yi alkawarin gina matatar mai a gabashin Afrika idan shugabannin yankin suka ba da goyon baya. Ya bayyana hakan ne ga shugabannin Kenya da Uganda, ciki har da William Ruto da Yoweri Museveni, yana mai cewa za ta yi kama da wadda ya gina a Nigeria mai karfin tace ganga 650,000 a rana.
Shugaba Ruto ya jaddada cewa Afrika dole ta rage dogaro da kasashen waje, yana mai cewa ba za a cimma buri ba idan ana ci gaba da fitar da albarkatun kasa ana kuma shigo da kayayyakin da aka sarrafa. Ya kara da cewa ya kamata nahiyar ta bunkasa masana’antu da gine-ginen more rayuwa domin karfafa tattalin arzikinta.
Rahoton ya kuma nuna cewa matsalar makamashi na bukatar sabbin cibiyoyi da kuma inganta tsoffin da ake da su. Masana sun nuna misalai na rashin amfani da wasu dam-dam na ruwa da kuma gazawar hada wutar lantarki da hanyoyin rarrabawa, yayin da kuma Afrika ke da kusan kashi 80% na ma’adinan phosphate amma tana samar da kashi 20% kacal na takin zamani a duniya—abin da ke nuna babbar dama da nahiyar za ta iya amfani da ita.
Majiyar Labari: Channels News
