Wani ɗan sanda na Iran ya rasa ransa a wani rikici da ya ɓarke a kusa da babban birnin Tehran, a daidai lokacin da zanga-zangar adawa da matsin rayuwa ke ƙara yaɗuwa a faɗin ƙasar. Kafofin watsa labarai na cikin gida sun ruwaito cewa an kashe Laftanar Kanar Shahin Dehghan bayan an caka masa wuƙa yayin zanga-zangar da ta tashi a birnin Malard, da ke yammacin Tehran.
Hukumomin tsaro sun ce an fara bincike domin gano waɗanda suka aikata laifin. Zanga-zangar dai ta fara ne tun ranar 28 ga Disamba a babbar kasuwar Tehran, sakamakon faɗuwar darajar kuɗin ƙasar da tabarbarewar tattalin arziki, kafin daga bisani ta bazu zuwa wasu birane da dama. Gwamnati ba ta fitar da adadin mutanen da suka mutu a hukumance ba.
A halin yanzu, kamfanin dillancin labarai na Tasnim ya ce adadin ’yan sanda da suka jikkata ya kai 568, yayin da wasu 66 daga rundunar Basij su ma suka samu raunuka. Iran na ci gaba da fuskantar matsin tattalin arziki, inda darajar kuɗin ƙasar ta fadi zuwa kusan 1,350,000 rial kan dala ɗaya, lamarin da ke ƙara tsananta zanga-zangar.
