Serikali ya Cameroon imetangaza kwamba mwanasiasa wa upinzani Anicet Ekane amefariki kifo cha asili akiwa kizuizini, siku chache baada ya uchaguzi wa urais uliompa Rais Paul Biya ushindi wa muhula wa nane. Ekane, mwenye umri wa miaka 74 na kiongozi wa chama cha Manidem, alikamatwa mjini Douala Oktoba 24 kwa tuhuma za kupanga maandamano kuunga mkono mgombea wa upinzani Issa Tchiroma Bakary.
Taarifa ya Wizara ya Ulinzi iliyosomwa kupitia radio ya taifa ilisema uchunguzi wa kitabibu umeonesha kuwa kifo chake kilihusiana na matatizo ya kiafya na historia ya matumizi ya dawa. Mwili wake uliwasilishwa kwa familia Jumatatu.
Ekane alikuwa mwanasiasa wa mrengo wa kushoto na amewahi kushiriki katika harakati za kisiasa kwa miongo kadhaa. Kifo chake kimeibua maswali miongoni mwa wafuasi wa upinzani, hasa ikizingatiwa kilitokea wakati wa mvutano wa kisiasa baada ya Bakary kujitangaza mshindi wa uchaguzi na kuhamasisha maandamano yaliyodhibitiwa na serikali.
Paul Biya, ambaye ameongoza taifa kwa muda mrefu, alithibitishwa tena kwa muhula wa miaka saba katika uchaguzi wa Oktoba 2025.
CHANZO: TRT Afrika
