Yayin da agogo ke dab da bugun ƙarfe goma sha biyu na daren sabuwar shekara, al’ummar duniya sun shiga sabuwar shekara da zuciya mai gauraye da farin ciki da kuma tunanin abubuwan da suka faru a shekarar 2025 — shekara da ta kasance cike da rikice-rikicen siyasa, yaƙe-yaƙe, matsin tattalin arziki da sauyin yanayi.
Masu shagulgulan sabuwar shekara a sassan duniya sun yi bankwana da 2025, shekara da ta shahara da harajin da tsohon shugaban Amurka Donald Trump ya kakaba bayan dawowarsa fadar White House a watan Janairu, lamarin da ya girgiza kasuwannin duniya. Haka kuma, an samu tsagaita wuta a Gaza, yayin da fata na samun zaman lafiya a Ukraine ya ci tura.
2025 ta kasance ɗaya daga cikin shekarun da suka fi zafi a tarihi, inda tsananin yanayi ya haddasa gobarar daji a Turai, fari a Afirka da kuma ambaliyar ruwa mai muni a yankunan Kudu maso Gabashin Asiya.
A birnin Sydney na ƙasar Australia, wanda ke kiran kansa “babban birnin sabuwar shekara na duniya,” an gudanar da shagulgula cikin yanayi na jimami. Wannan na zuwa ne kasa da makonni biyu bayan wani mummunan harin bindiga da ya hallaka mutane 15 a wani bikin Yahudawa a Bondi Beach. An dakata da shagulgula na minti ɗaya kafin ƙarfe 11 na dare, yayin da aka haskaka gadar Sydney Harbour da farin haske a matsayin alamar zaman lafiya.
Duk da tsauraran matakan tsaro, daruruwan dubban mutane sun taru domin kallon wutar tartsatsin sabuwar shekara, inda sama da tan tara na wuta suka haskaka sararin samaniya. Haka kuma, ana sa ran sama da mutane miliyan biyu za su hallara a bakin tekun Copacabana na Brazil domin bikin sabuwar shekara mafi girma a duniya.
A fannin siyasa da al’adu, 2025 ta ga dawowar Donald Trump kan mulki, shaharar kayan wasan Labubu, dawowar ƙungiyar K-pop ta BTS, da kuma satar kayan tarihi a gidan adana kayan tarihi na Louvre. Haka kuma, duniya ta yi bankwana da fitacciyar masaniyar namun daji Jane Goodall, yayin da Vatican ta zaɓi sabon Fafaroma.
A yankin Gabas ta Tsakiya, matsin lambar Amurka ya taimaka wajen samar da tsagaita wuta tsakanin Isra’ila da Hamas a watan Oktoba, duk da cewa bangarorin biyu na zargin juna da karya yarjejeniyar. Rikicin ya riga ya yi sanadiyyar mutuwar dubban fararen-hula.
Yayin da duniya ke shiga 2026, ana sa ran shekarar za ta kasance cike da manyan al’amura a fannin wasanni, binciken sararin samaniya da fasahar kere-kere. Daga shirye-shiryen tura ɗan adam zuwa kusa da wata, zuwa gasar cin kofin duniya mafi girma a tarihi da kuma Olympics na hunturu a Italiya, duniya na fatan sabuwar shekara za ta zo da sauƙi da fata fiye da wadda ta wuce.
