Hamshaƙin attajiri na Amurka, Elon Musk, ya zama mutum na farko a tarihin duniya da kimarsa ta kai dalar Amurka tiriliyan guda.
Wannan ya tabbata ne bayan kamfaninsa na fasahar sararin samaniya, SpaceX, ya fitar da farashin kuɗin sayar da hannun-jarinsa da aka ƙaddamar kan dala $135.
Elon ya cimma wannan mataki ne aƙalla bisa lissafi, kamar yadda masu ƙididdiga suka bayyana.
Kamfanin na Space Exploration Technologies Corp, wanda aka fi sani da SpaceX, ya sayar da hannun-jari Ajin A guda miliyan 555.6, kan dala $135, inda ya tara kusan dala biliyan $75 a wani cinikin hannun-jari mafi girma a tarihin duniya.
Cinikin ya sanya kamfanin ya kai kimar kusan tiriliyan $1.77, kuma ana sa ran zai mayar da SpaceX ɗaya daga cikin kamfanonin duniya mafi girma da ke kasuwar hannun jari.
Bayanai sun nuna cewa Elon Musk zai riƙe kusan hannun-jari Ajin A guda miliyan 849.5, da hannun-jari Ajin B guda biliyan 5.57, bayan ƙaddamar da hannun-jarin kamfaninsa na SpaceX.
Wato dai a yanzu Elon ya tsira da kashi 84.4% na ikon yanke hukunci a kamfanin nasa.
