Baada ya kutokushiriki mashindano ya kimataifa kwa zaidi ya miaka sita, Eritrea sasa inajiandaa kucheza mechi yake ya kwanza ya kimataifa katika raundi ya awali ya kufuzu Kombe la Mataifa ya Afrika (AFCON) 2027. Timu hiyo ya Pwani ya Bahari Nyekundu imepangwa kukutana na Eswatini kwa mechi mbili mwezi Machi, ikiwa ni mara ya kwanza tangu waliposhindwa kirafiki dhidi ya Sudan Januari 2020.
Eritrea ilijiondoa kwenye mashindano ya kufuzu Kombe la Dunia na AFCON kutokana na wachezaji wake kukimbia mara kwa mara walipokuwa safarini. Tangu mwaka 2007, inakadiriwa zaidi ya wachezaji 80 wamekimbia baada ya mechi au mashindano katika nchi mbalimbali, jambo lililosababisha serikali kuzuia safari za timu kwenda nje tangu mwaka 2019.
Iwapo Eritrea itashiriki kikamilifu katika kufuzu kwa AFCON 2027, itakuwa mara ya kwanza katika historia ambapo mataifa yote 54 ya Afrika yatashiriki mashindano hayo. Kwa sasa Eritrea haina nafasi katika viwango vya FIFA kwa sababu haijacheza mechi yoyote rasmi kwa zaidi ya miezi 48.
Katika droo ya raundi ya awali, timu 12 za chini kwa viwango ziligawanywa kwenye michezo ya mtoano, ikiwemo Eritrea dhidi ya Eswatini, Djibouti dhidi ya Sudan Kusini, na Somalia dhidi ya Mauritius. Mechi hizo zitaanza kati ya Machi 25–31, na washindi wataingia hatua ya makundi pamoja na timu 42 bora barani Afrika.
CHANZO: TRT Afrika
