Hukumar Binciken Manyan Laifuka ta Amurka FBI ta yi alƙawarin bayar da ladar dala 200,000 ga duk wanda ya taimaka da bayanin da ya kai ga kama tsohuwar jami’ar Rundunar Sojin Saman Amurka, Monica Witt wadda ake zargi da komawa Iran a shekarar 2013.
A cikin wata sanarwa da hukumar ta fitar a ranar Alhamis, hukumar ta ce ana ganin cewa “mai yiwuwa har yanzu tana da hannu wajen tallafa wa haramtattun ayyukan Iran.”
“FBI ba ta manta ba kuma tana ganin cewa a wannan muhimmin lokacin a tarihin Iran, akwai wanda yake da wani bayani game da inda take,” in ji Daniel Wierzbicki, daƴa daga cikin manyan jami’an leƙen asiri na FBI a Washington.
“FBI na son jin daga gare ku don ku taimaka mana kama Witt da kawo ta gaban shari’a,” in ji hukumar.
Witt, tsohuwar jami’ar leƙen asiri a Ofishin Bincike na Musamman na Rundunar Sojan Sama, ta yi aiki a kan ayyuka a Gabas ta Tsakiya daga 2003 zuwa 2008.
A shekarar 2019, a lokacin Mataimakin Babban Lauya na Tarayya John Demers, ya yi zargin cewa Iran ta ɗauki Witt aiki, wadda daga baya ta tsere kuma ake zargin ta fallasa “shirin tattara bayanan leƙen asiri mai matukar sirri” kuma ta fallasa wani jami’in leken asiri na Amurka, “ta haka tana sanya rayuwar wannan mutum cikin haɗari.”
Masu shigar da ƙara sun yi zargin cewa tsakanin Janairun 2012 da Mayun 2015, Witt ta yi shirin haɗin gwiwa da ‘yan Iran a Iran da wasu wurare a wajen Amurka don samar da “takardu da bayanai da suka shafi tsaron ƙasa na Amurka,” tare da nufin, da amincewa za a yi amfani da su don cutar da Amurka da kuma amfani ga Iran.
A cewar ƙarar, bayan ta tsere, jami’an Iran sun samar wa Witt “kayayyaki da ayyuka, ciki har da mazauni da kayan kwamfuta,” don tallafa wa aikinta. Har yanzu ba a fayyace ko tana da wakilin lauya daga Amurka ba.
