Ministan Harkokin Cikin Gida na Nijeriya, Olubunmi Tunji-Ojo, ya kafa wani kwamiti mai zaman kansa mai mambobi 10 domin binciken mutuwar mutane 37 da aka ruwaito sun mutu a lokacin da suke tsare a hannun Rundunar Tsaron Fararen-Hula ta Nijeriya (NSCDC) a Jihar Neja.
Rahotanni sun ce an tsare waɗanda abin ya shafa ne bisa zargin haƙar ma’adinai ba bisa ƙa’ida ba. Lamarin ya faru ne a ranar Alhamis, 17 ga Satumban, 2026, lamarin da ya sa Shugaba Bola Ahmed Tinubu ya bayar da umarnin gudanar da cikakken bincike cikin gaskiya kuma ba tare da wani cikas ba.
Tunji-Ojo ya kuma bayar da umarnin dakatar da dukkan jami’an da ake zargin suna da hannu a lamarin, ciki har da Kwamandan NSCDC na Jihar Neja, har zuwa lokacin da binciken ya kammala. An kuma bayyana sunayen wasu jami’ai 20 da aka dakatar.
Kwamitin, wanda tsohon Mataimakin Darakta-Janar na Hukumar DSS, Jonathan Kure, ke jagoranta, zai tabbatar da sunayen waɗanda suka mutu tare da binciken yadda aka kama su, yadda aka tsare su, da kuma musabbabin mutuwarsu da yanayin da mutuwar ta faru.
Haka kuma, kwamitin zai binciki ko akwai sakaci, rashin ɗa’a ko hannu wajen mutuwar, tare da bayar da shawarwarin matakan da ya kamata a ɗauka, da kuma biyan diyya inda ya dace, da hanyoyin hana sake faruwar irin wannan lamari.
Kwamitin yana da makonni biyu ya kammala bincikensa tare da gabatar da rahoto ga ministan. Za a ba shi damar ziyartar wuraren da lamarin ya faru, duba bayanai da shaidu, da kuma karɓar bayanai daga jama’a.
Ministan ya yi gargaɗin cewa duk wanda ya yi ƙoƙarin lalata ko ɓoye shaida, tsoratar da shaidu ko hana binciken gudana, za a ɗauki matakin da ya dace a kansa.
Ya miƙa ta’aziyyarsa ga iyalan waɗanda suka rasu tare da yin kira da a kwantar da hankali yayin da ake ci gaba da binciken.
