Akalla mutum ɗaya ya mutu yayin da wasu 13 suka jikkata bayan wani sabon hari da Rasha ta kai kusa da birnin Kharkiv a Ukraine.
Rasha ta ci gaba da kai hare-hare kan Ukraine, inda wani harin ya faɗa cibiyar wutar lantarki da ke kusa da birnin Kharkiv, lamarin da ya haddasa mutuwar mutum guda da jikkatar wasu 13 tare da kawo tsaiko a harkokin sufuri a yankin.
A gefe guda kuma, sojojin Ukraine sun ce sun kai hare-hare a cikin Rasha, ciki har da wata masana’anta a yankin Tula da ake kera abubuwan fashewa da jirage marasa matuƙa, sannan sun kai wani hari a yankin Crimea da Rasha ta mamaye.
Ministan tsaron Rasha ya bayyana cewa dakarunsu sun ƙwace iko da garin Zarichne da ke gabashin yankin Zaporizhzhia na Ukraine, yayin da yaƙin ke ci gaba da tsananta a sassa daban-daban.
