Jamhuriyar Benin da Tarayyar Afirka (AU) sun nuna alhini mai zurfi kan mummunan harin ta’addanci da aka kai a Nijeriya, wanda ya hallaka daruruwan fararen hula. A cikin sanarwa daban-daban da suka fitar, sun jaddada cewa harin ya girgiza zukatan jama’a tare da sake haskaka matsalar tsaro da ke addabar yankin.
Gwamnatin Benin ta bayyana “ta’aziyyarta ta musamman” ga iyalan wadanda abin ya shafa, al’ummar Nijeriya da gwamnatin ƙasar, tana mai sake jaddada cikakken goyon bayanta ga Abuja wajen yaƙi da ta’addanci da tsattsauran ra’ayi. Ta kuma nuna muhimmancin haɗin gwiwa domin kare zaman lafiya da kwanciyar hankali a yankin.
A nasa bangaren, Shugaban Hukumar Tarayyar Afirka, Mahmoud Ali Youssouf, ya bayyana harin a matsayin mummunan aiki na rashin imani da take hakkin ɗan’adam, yana mai cewa ba za a taɓa amincewa da irin wannan hari da ke barazana ga zaman lafiya da tsaro ba. Ya mika ta’aziyya ga iyalan wadanda abin ya shafa tare da bayyana cikakken goyon bayan AU ga gwamnatin Nijeriya da hukumomin Jihar Kwara.
Rahotanni daga jihar Kwara sun nuna cewa an binne mutum 75 a kabarin bai-ɗaya, amma wani ɗan majalisa, Saidu Baba Ahmed, ya ce an gano gawawwaki har 170, kuma ana sa ran adadin zai ƙaru yayin da ake ci gaba da bincike a dazuzzuka. Jihar Kwara na fuskantar ƙaruwa a matsalolin tsaro a ‘yan watannin nan, musamman a yankunan da ke kusa da dazuzzuka, sakamakon fashi da makami, garkuwa da mutane da motsin ƙungiyoyi masu dauke da makamai.
Majiyar Labari: TRT HAUSA
