Abdullahi Abubakar, fitaccen malamin addinin Musulunci wanda ya samu yabo a cikin gida da waje saboda kare Kiristoci a lokacin hare-haren Plateau na shekarar 2018, ya rasu yana da shekaru 92.
Marigayi Abdullahi Abubakar shi ne babban limamin ƙauyen Nghar da ke Ƙaramar Hukumar Barkin Ladi a Jihar Plateau. A ranar 23 ga Yuni, 2018, lokacin da ‘yan bindiga suka kai hari kan wasu al’ummomi, limamin ya buɗe masallacinsa da gidansa tare da ɓoye Kiristoci fiye da 300 domin kare rayukansu.
Rahotanni sun nuna cewa limamin ya ƙi miƙa mutanen ga maharan duk da barazanar da aka yi masa, abin da ya taimaka wajen ceto rayuka da dama har sai da aka samu kwanciyar hankali.
Saboda wannan jarumta tasa, gwamnatin tarayya ta ba shi yabo tare da naɗa shi don karɓar lambar girmamawa ta ƙasa (MON), yayin da Amurka ta ba shi lambar yabo ta International Religious Freedom Award a shekarar 2019.
Gwamnan Jihar Plateau, Caleb Mutfwang, ya bayyana marigayin a matsayin ginshiƙin zaman lafiya da haɗin kai tsakanin addinai, yana mai cewa rasuwarsa ta bar giɓi mai girma a Barkin Ladi da ma jihar baki ɗaya.
